ଲୋକେ ହିଂସା ଭିଆଇଲେ ପୋଲିସ ଗୁଳି ଚଳାଇବ

ଲୋକେ ହିଂସା ଭିଆଇଲେ ପୋଲିସ ଗୁଳି ଚଳାଇବ ।

ସିଏଏ ବିରୋଧୀ ବିକ୍ଷୋଭ ପ୍ରଦର୍ଶନ ବେଳେ ପୋଲିସ କାର୍ଯ୍ୟାନୁଷ୍ଠାନକୁ ସମର୍ଥନ କଲେ ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହ

ନୂଆଦିଲ୍ଲୀ,୨ ।୧: ନାଗରିକତା ସଂଶୋଧନ ଆଇନ (ସିଏଏ) ବିରୋଧୀ ବିକ୍ଷୋଭ ପ୍ରଦର୍ଶନ ବେଳେ ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନକୁ ନେଇ ଦେଶବ୍ୟାପୀ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିବାବେଳେ ଗୁରୁବାର ଏହାକୁ ସମର୍ଥନ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଏକ ଟିଭି ଚ୍ୟାନେଲକୁ ସାକ୍ଷାତକାର ଦେଇ ଶାହ କହିଛନ୍ତି, ଯେଉଁମାନେ ପ୍ରଶ୍ନ କରୁଛନ୍ତି ସେମାନେ ଦିନକ ପାଇଁ ପୋଲିସ ପୋଷାକ ପିନ୍ଧି ଛିଡ଼ା ହୋଇଯାଆନ୍ତୁ । ଏହା କେହି ପଚାରୁ ନାହାନ୍ତି ଯେ ବସଗୁଡ଼ିକୁ କାହିଁକି ପୋଡ଼ି ଦିଆଗଲା? ଗାଡ଼ିଗୁଡ଼ିକରେ ନିଆଁ କାହିଁକି ଲଗାଗଲା? ଲୋକଙ୍କୁ ଓହ୍ଲାଇ ଓହ୍ଲାଇ ବସଗୁଡ଼ିକରେ ନିଆଁ ଲଗାଯାଇଥିଲା । ଲୋକେ ଯେତେବେଳେ ହିଂସା ଭିଆଇବେ ପୋଲିସ ତ ଗୁଳି ଚଳାଇବ ହିଁ ଚଳାଇବ । ପୋଲିସକୁ ତା’ ନିଜ ଜୀବନ ବି ବଞ୍ଚାଇବାକୁ ପଡ଼ିବ । ବସରେ ନିଆଁ ନଲଗାଇଥିଲେ ଲାଠି ମାଡ଼ ପଡ଼ି ନଥାନ୍ତା । ଅନେକ ରାଜ୍ୟରେ ଘଟିଥିବା ହିଂସାକାଣ୍ଡରେ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ (ପିଏଫ୍ଆଇ)ର ସମ୍ପୃକ୍ତି ଅଭିଯୋଗ ଆସୁଛି । ଏହାକୁ ନେଇ ଶାହ କହିଛନ୍ତି, ଏହା କୌଣସି ରାଜନେତା କହୁନାହାନ୍ତି, ଏହା ପୋଲିସ ରିପୋର୍ଟ ଅଟେ । ପିଏଫ୍ଆଇ ଉପରେ କଟକଣା ଜାରି ସମ୍ପର୍କରେ ସେ କହିଲେ, ଦେଶର ସ୍ୱରାଷ୍ଟ୍ରମନ୍ତ୍ରୀ ଭାବେ କାହା ଉପରେ ନିଷେଧାଦେଶ ଜାରି କରିବା ପୂର୍ବରୁ ସେ ଏହା ଉପରେ ମନ୍ତବ୍ୟ ଦେବେ ନାହିଁ ।