କେତେ ସୁରକ୍ଷିତ ଅପଣଙ୍କ ୟୁପିଆଇ ପିନ୍

କେତେ ସୁରକ୍ଷିତ ଅପଣଙ୍କ ୟୁପିଆଇ ପିନ୍
ଠକେଇରେ ନପଡ଼ିବା ପାଇଁ ଧ୍ୟାନରେ ରଖନ୍ତୁ ଏହି କଥା

ଭାରତ ସରକାର ଦେଶରେ ଡିଜିଟାଲ ଲେଣଦେଣକୁ ପ୍ରତ୍ସୋହନ ଦେଉଛନ୍ତି । ୨୦୨୧ ମସିହା ପର୍ଯ୍ୟନ୍ତ ଦେଶରେ ଡିଜିଟାଲ କାରବାର ୪ ଗୁଣ ବୃଦ୍ଧି ପାଇବା ଆଶା ରହିଛି । ଭାରତରେ ଲୋକେ ଡିଜିଟାଲ ଲେଣଦେଣ ପାଇଁ ୟୁନିଫାଏଡ୍ ପେମେଣ୍ଟସ୍ ଇଣ୍ଟରଫେସ୍ (ୟୁପିଆଇ)କୁ ବହୁଳ ଭାବେ ବ୍ୟବହାର କରନ୍ତି । ୟୁପିଆଇ ଜରିଆରେ ପ୍ରତିମାସ ହଜାର ହଜାର କୋଟି କୋଟି ଟଙ୍କାର କାରବାର ହେଉଛି । କିନ୍ତୁ ପ୍ରଶ୍ନ ଉଠୁଛି ୟୁପିଆଇ କେତେ ସୁରକ୍ଷିତ । ଡିଜିଟାଲ ଦେଣଲେଣ ଗ୍ରାହକଙ୍କ ପାଇଁ ଲାଭଦାୟକ ହେବା ସହ ସେମାନଙ୍କ ପାଇଁ କେତେ ବିପଦ ଅଟେ ।
ଦେଶରେ ସୂଚନା ଓ ପ୍ରଯୁକ୍ତିବିଦ୍ୟାର ବିକାଶ ସହ ଅନ୍ଲାଇନ୍ ଠେକେଇ ଖୁବ୍ ବଢ଼ିବାରେ ଲାଗିଛି । ହ୍ୟାକର୍ସ ସାଧାରଣ ଲୋକଙ୍କୁ ଠକିବା ପାଇଁ ନିତି ନୂଆ ନୂଆ ଉପାୟ ଆପଣାଉଛନ୍ତି । ପ୍ରତିଦିନ ସାଇବର ଅପରାଧ ଘଟଣା ସାମ୍ନାକୁ ଆସିବାରେ ଲାଗିଛି, ଯେଉଁଠି ଲୋକଙ୍କ ଖାତାରୁ ଟଙ୍କା ଉଠାଇ ନିଆଯାଏ । ଏଥିପାଇଁ ସୁରକ୍ଷିତ ଲେଣଦେଣ କରିବା ଲାଗି କେତେକ ଜରୁରୀ ବିଷୟର ଅବତାରଣା କରାଯାଉଛି, ଯାହା ମାଧ୍ୟମରେ ଆପଣ ଠକାମିର ଶିକାର ହେବାରୁ ନିଜକୁ ବଞ୍ଚାଇ ପାରିବେ ।
କାହାକୁ କୁହନ୍ତୁନି ୟୁପିଆଇ ପିନ୍: ଆପଣଙ୍କ ୟୁପିଆଇ ପିନ୍ ଏଟିଏମ୍ ପିନ୍ ଭଳି । ତେଣୁ ଏହାକୁ କାହା ସହିତ ଶେୟାର କରନ୍ତୁ ନାହିଁ । ଏପରି କରିବା ଦ୍ୱାରା ଫ୍ରଡ୍ ମାନେ ଏହାର ଅପବ୍ୟବହାର କରି ଆପଣଙ୍କୁ ଠକିପାରନ୍ତି ।
ସୁରକ୍ଷିତ ଆପ୍ ଉପରେ ହିଁ କରନ୍ତୁ ୟୁପିଆଇ ପିନ୍ ର ବ୍ୟବହାର: କ୍ଷତିକାରକ ଆପ୍ଲିକେଶନରୁ ଦୂରେଇ ରହିବା ଉଚିତ । ନିଜର ୟୁପିଆଇ ପିନକୁ ସମ୍ଭାଳି ରଖନ୍ତୁ । କାରଣ ଏହାକୁ ନେଇ ଠକେଇରେ ପଡ଼ିପାରନ୍ତି । ସତର୍କତା ପାଇଁ ଭିମ୍ ୟୁପିଆଇ ଭଳି ସୁରକ୍ଷିତ ଆପ୍ଲିକେଶନରେ ହିଁ ୟୁପିଆଇ ପିନ୍ ବ୍ୟବହାର କରନ୍ତୁ । ଯଦି କୌଣସି ୱେବ୍ସାଇଟ ବା ଫର୍ମରେ ୟୁପିଆଇ ପିନ୍ ବ୍ୟବହାର ପାଇଁ ଲିଙ୍କ୍ ଦିଆଯାଇଥାଏ, ସେଥିରୁ ବଞ୍ଚନ୍ତୁ ।
କେବଳ ଟଙ୍କା ପଠାଇବା ପାଇଁ ବ୍ୟବହାର କରନ୍ତୁ ୟୁପିଆଇ ପିନ୍: ଲେଣଦେଣ କରିବା ସମୟରେ ଗୋଟିଏ କଥା ଧ୍ୟାନରେ ରଖନ୍ତୁ । ଆପଣଙ୍କ ୟୁପିଆଇ ପିନ୍ ବ୍ୟବହାର ପାଇଁ କେବଳ ସେତେବେଳେ ହିଁ କୁହାଯିବ, ଯେତେବେଳେ ଆପଣଙ୍କୁ ଟଙ୍କା ପଠାଇବାକୁ ଥିବ । ଯଦି ଆପଣଙ୍କୁ କେଉଠୁ ଟଙ୍କା ମିଳିବାକୁ ଯାଉଥିବ ଓ ସେଥିପାଇଁ ଆପଣଙ୍କୁ ୟୁପିଆଇ ପିନ୍ ମଗାଯାଉଥିବ, ତେବେ ଜାଣିଯିବେ ତାହା ଫ୍ରଡ୍ ହୋଇପାରେ ।
କଷ୍ଟମର କେୟାର ସହିତ କିପରି କରିବେ ଯୋଗାଯୋଗ: ଯଦି ଆପଣଙ୍କ ଲେଣଦେଣରେ ଅସୁବିଧା ହେଉଛି ଏବଂ ଆପଣଙ୍କୁ ଗ୍ରାହକ ସେବା ସହିତ ସମ୍ପର୍କ କରିବାର ଅଛି ତେବେ କେବଳ ପେମେଣ୍ଟ ଆପ୍ଲିକେଶନର ବ୍ୟବହାର କରନ୍ତୁ । ଇଣ୍ଟରନେଟରେ ଦିଆଯାଇଥିବା କୌଣସି ଫୋନ୍ ନମ୍ବରକୁ କଲ୍ କରନ୍ତୁ ନାହିଁ, ଯାହାର କନଫରମେଶନ୍ ହୋଇନଥିବ ।
ୟୁପିଆଇ କ’ଣ?: ୟୁପିଆଇ ଅର୍ଥାତ ୟୁନିଫାଏଡ୍ ପେମେଣ୍ଟସ୍ ଇଣ୍ଟରଫେସ୍ ଏକ ଆନ୍ତଃ ବ୍ୟାଙ୍କ ଫଣ୍ଡ୍ ଟ୍ରାନ୍ସଫର ସୁବିଧା, ଯାହା ଜରିଆରେ ସ୍ମାର୍ଟଫୋନରେ ଫୋନ୍ ନମ୍ବର ଓ ଭର୍ଚୁ୍ୟଆଲ ଆଇଡି ସାହାଯ୍ୟରେ ଦେୟ ପଇଠ (ପେମେଣ୍ଟ) କରାଯାଇଥାଏ । ଏହି ଇଣ୍ଟରନେଟ୍ ବ୍ୟାଙ୍କ ଫଣ୍ଡ୍ ଟ୍ରନ୍ସଫର ମେକାନିଜମ୍ ଉପରେ ଆଧାରିତ ।
କିପରି କାମ କରେ ୟୁପିଆଇ: ଏନପିସିଆଇ ଦ୍ୱାରା ଏହି ସିଷ୍ଟମକୁ ନିୟନ୍ତ୍ରଣ କରାଯାଏ । ୟୁଜର୍ସ ୟୁପିଆଇ ବଳରେ ଘରେ ବସି କିଛି ମୁହୂର୍ତ୍ତ ମଧ୍ୟରେ ପେମେଣ୍ଟ ସହିତ ମନି ଟ୍ରାନ୍ସଫର କରିପାରନ୍ତି ।