ଏପ୍ରିଲ୍‌ ୨୮ରୁ ଯୁକ୍ତ ଦୁଇ ପରୀକ୍ଷା: ପ୍ରଥମ ଦିନ ଓଡ଼ିଆ ଭାଷା ପରୀକ୍ଷା, ସକାଳ ୯ଟାରୁ ୧୨ଟା ଯାଏ ପରୀକ୍ଷା ଚାଲିବ

ଭୁବନେଶ୍ୱର, ୨୫/୦୩: ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍‌ଏସ୍‌ଇ) ଦ୍ୱାରା ପରିଚାଳିତ ଯୁକ୍ତ ଦୁଇ ବୋର୍ଡ ପରୀକ୍ଷା ଆସନ୍ତା ଏପ୍ରିଲ୍‌ ୨୮ ତାରିଖରୁ ଆରମ୍ଭ ହେବ। ମେ ୨୮ ଯାଏ ପରୀକ୍ଷା ଚାଲିବ । ପ୍ରଥମ ଦିନରେ ମାତୃଭାଷା ପରୀକ୍ଷା କରାଯିବ । ସକାଳ ୯ଟାରୁ ୧୨ଟା ଯାଏ ପରୀକ୍ଷା ଚାଲିବ। ଏନେଇ ଗୁରୁବାର ସିଏଚ୍‌ଏସ୍‌ଇ ପକ୍ଷରୁ ପରୀକ୍ଷା ସୂଚୀ ପ୍ରକାଶ ପାଇଛି ।

ପ୍ରଥମ ଦିନ ମାତୃଭାଷା ପରେ ଏପ୍ରିଲ୍‌ ୩୦ରେ କଳା ଓ ବାଣିଜ୍ୟ ପିଲାଙ୍କର ଇଂରାଜୀ ବିଷୟ ପରୀକ୍ଷା କରାଯିବ। ମେ ୫ ତାରିଖରେ ଇତିହାସ, ବିଜିନେସ୍‌ ମ୍ୟାଥ୍‌ମେଟିକ୍‌ ଆଣ୍ଡ ଷ୍ଟାଟିଷ୍ଟିକସ୍‌, ୭ରେ ରାଜନୀତି ବିଜ୍ଞାନ ଓ ଆକାଉଣ୍ଟାନ୍ସି, ୯ରେ ବିଜ୍ଞାନ ଓ ଧନ୍ଦାମୂଳକ ଛାତ୍ରଛାତ୍ରୀଙ୍କ ଇଂରାଜୀ, ୧୦ରେ ଅର୍ଥନୀତି, ଆଇଆର୍‌ପିଏମ୍‌, ଫଣ୍ଡାମେଣ୍ଟାଲ୍‌ ଅଫ୍‌ ମ୍ୟାନେଜମେଣ୍ଟ ଆକାଉଣ୍ଟିଂ, ବିଜିନେସ୍‌ ଇକୋନୋମିକ୍ସ, କଷ୍ଟ ଆକାଉଣ୍ଟିଂ ଓ କମ୍ପ୍ୟୁଟର ଆପ୍ଲିକେସନ୍‌, ୧୧ରେ ରସାୟନ ବିଜ୍ଞାନ, ଧନ୍ଦାମୂଳକ ଛାତ୍ରଛାତ୍ରୀଙ୍କ ଇତିହାସ, ଆକାଉଣ୍ଟିଂ ଓ ପଦାର୍ଥବିଜ୍ଞାନ, ୧୩ରେ ଶିକ୍ଷା, ଭାରତୀୟ ସଙ୍ଗୀତ, ମନୋବିଜ୍ଞାନ, ବିଜିନେସ୍‌ ଷ୍ଟଡିଜ୍‌ ଆଣ୍ଡ ମ୍ୟାନେଜମେଣ୍ଟ, ୧୪ରେ ପଦାର୍ଥବିଜ୍ଞାନ, ଧନ୍ଦାମୂଳକ ପିଲାଙ୍କ ରାଜନୀତିବିଜ୍ଞାନ, ବିଜିନେସ୍‌ ଷ୍ଟଡିଜ୍‌ ଆଣ୍ଡ ମ୍ୟାନେଜ୍‌ମେଣ୍ଟ, ରସାୟନବିଜ୍ଞାନ, ୧୭ରେ ଜୀବବିଜ୍ଞାନ (ଉଦ୍ଭିଦ ବିଜ୍ଞାନ ଓ ପ୍ରାଣୀବିଜ୍ଞାନ) ବିଷୟର ପରୀକ୍ଷା ହେବ ।

ମେ ୧୮ରେ ଆଇଟି ଆଣ୍ଡ ଆଇଟିଇଏସ୍‌, ମଲ୍ଟି ସ୍କିଲିଂ, ଟୁରିଜିମ୍‌ ଆଣ୍ଡ ହସ୍ପିଟାଲିଟି, ଏଗ୍ରିକଲଚର, ପ୍ଲମ୍ବର, ଅଟୋମେଟିଭ୍‌, ଇଲେକ୍‌ଟ୍ରୋନିକ୍ସ ଆଣ୍ଡ ହାର୍ଡୱେୟାର, ରିଟେଲ୍‌, କନ୍‌ଷ୍ଟ୍ରକ୍ସନ୍‌, ବିୟୁଟି ଆଣ୍ଡ ୱେଲନେସ୍‌, ୧୯ରେ ଗଣିତ, ଗୃହବିଜ୍ଞାନ ଓ ଧନ୍ଦାମୂଳକ ଛାତ୍ରଛାତ୍ରୀଙ୍କ ଜୀବବିଜ୍ଞାନ ବିଷୟ ପରୀକ୍ଷା କରାଯିବ । ଇଣ୍ଟିଗ୍ରେଟେଡ୍‌ ଭୋକେସ୍‌ନାଲ୍‌ ବିଷୟର ପରୀକ୍ଷା ମେ ୨୦ ଓ ୨୧ ତାରିଖରେ ହେବ । ଭାଷାରେ ଅପ୍ସନାଲ୍‌ ରଖିଥିବା ପିଲାଙ୍କ ପରୀକ୍ଷା ୨୩ ଓ ୨୪ ତାରିଖରେ କରାଯିବ । ୨୫ରେ ଲଜିକ୍‌, ଭୂଗୋଳ ଓ ଧନ୍ଦାମୂଳକ ପିଲାଙ୍କ ଅଲ୍‌ ଟ୍ରେଡ୍‌ ପେପର୍‌-୩, ଅନ୍ୟ ସବୁ ମାତୃଭାଷା ପରୀକ୍ଷା ୨୬ ତାରିଖରେ ହେବ । ୨୭ରେ ଆନ୍ଥ୍ରୋପୋଲୋଜି, ସୋସିଓଲୋଜି ଓ ଷ୍ଟାଟିଷ୍ଟିକ୍‌ ଏବଂ ଶେଷ ଦିନ ଅର୍ଥାତ୍‌ ମେ ୨୮ ତାରିଖରେ ଜିଓଲୋଜି ବିଷୟର ପରୀକ୍ଷା କରାଯିବ।

ଛାତ୍ରଛାତ୍ରୀ ପରୀକ୍ଷାର ୩୦ ମିନିଟ୍‌ ପୂର୍ବରୁ କେନ୍ଦ୍ର ଭିତରକୁ ଯିବେ। ପରୀକ୍ଷାର ୧୫ ମିନିଟ୍‌ ପୂର୍ବରୁ ପରୀକ୍ଷା ଗୃହରେ ପହଞ୍ଚିବେ । ୧୦ ମିନିଟ୍‌ ପୂର୍ବରୁ ଉତ୍ତରଖାତା ଓ ୫ ମିନିଟ୍‌ ପୂର୍ବରୁ ପ୍ରଶ୍ନପତ୍ର ଦିଆଯିବ। ୨୦୧୫ ସୁଦ୍ଧା ପଞ୍ଜୀକରଣ କରିଥିବା ସମସ୍ତ କମ୍ପାଟ୍‌ମେଣ୍ଟାଲ୍‌ ଛାତ୍ରଛାତ୍ରୀ ସବୁ ବିଷୟରେ ପରୀକ୍ଷା ଦେବେ ।

ଥିଓରି ପରୀକ୍ଷା ପୂର୍ବରୁ ଆସନ୍ତା ଏପ୍ରିଲ୍‌ ୪ରୁ ୧୨ ତାରିଖ ଭିତରେ କଲେଜରେ ପ୍ରାକ୍ଟିକାଲ୍‌ ପରୀକ୍ଷା କରାଯିବ । ପ୍ରାକ୍ଟିକାଲ୍‌ ପାଇଁ ଏକ୍ସଟରନାଲ୍‌ ଆସିବେନି । ସମ୍ପୃକ୍ତ କଲେଜର ଅଧ୍ୟାପକ ହିଁ ପ୍ରାକ୍ଟିକାଲ୍‌ କରାଇବେ । ଏଥିପାଇଁ ତୁରନ୍ତ ପିଲାଙ୍କର ଗ୍ରୁପ୍‌ କରିବାକୁ ସମସ୍ତ ଅଧ୍ୟକ୍ଷଙ୍କୁ କୁହାଯାଇଛି। ଏହି ସମୟ ବାଦ୍‌ ଯଦି କୌଣସି କଲେଜରେ ପ୍ରାକ୍ଟିକାଲ୍‌ ପରୀକ୍ଷା କରାଗଲା, ପିଲାଙ୍କ ମାର୍କକୁ ସ୍ଥଗିତ ବା ବାତିଲ କରାଯିବ ବୋଲି ସିଏଚ୍‌ଏସ୍‌ଇ ପକ୍ଷରୁ କୁହାଯାଇଛି।