ପିପିଲି ବିଧାନସଭା ଉପନିର୍ବାଚନ ; ୧୧ ସୁଦ୍ଧା ୨୪.୭୬% ମତଦାନ

ପିପିଲି : ଆଜି ପିପିଲି ବିଧାନସଭା ଉପନିର୍ବାଚନ। କୋଭିଡ ଗାଇଡଲାଇନ ଅନୁଯାୟୀ ସକାଳ ୭ଟାରୁ ମତଦାନ ଆରମ୍ଭ ହୋଇଛି। ସନ୍ଧ୍ୟା ୬ଟା ଯାଏଁ ମତଦାନ ଜାରି ରହିବ। ପୂର୍ବାହ୍ନ ୧୧ଟା ସୁଦ୍ଧା ୨୪.୭୬% ମତଦାନ କରାଯାଇଛି।

ପିପିଲି ନିର୍ବାଚନ ମଣ୍ଡଳୀର ସମସ୍ତ ୩୪୮ ବୁଥ ରେ ଆଜି କଡା ପୁଲିସ ସୁରକ୍ଷା ମଧ୍ୟରେ ଭୋଟ ଗ୍ରହଣ ଶାନ୍ତି ଶୃଙ୍ଖଳାର ସହ ବେଶ୍ ସୁରୁଖୁରୁରେ ଚାଲିଛି । ସକାଳେ କେତେକ ମତଦାନ କେନ୍ଦ୍ରରେ ଇଭିଏମରେ ତ୍ରୁଟି ପରିଲକ୍ଷିତ ହୋଇଥିବା ବେଳେ ସେସବୁକୁ ସଜାଡ଼ିବା ପରେ ମତଦାନ ସୁରୁଖୁରୁରେ ଚାଲିଛି  । ଉପନିର୍ବାଚନ ପାଇଁ ପିପିଲି ବିଧାନସଭା ନିର୍ବାଚନମଣ୍ଡଳୀର ମୋଟ ୨ ଲକ୍ଷ ୨୯ ହଜାର ୯୯୮ ଜଣ ଭୋଟର ସେମାନଙ୍କ ମତ ସାବ୍ୟସ୍ତ କରିବେ। ନିର୍ବାଚନରେ ୧୦ ଜଣ ପ୍ରାଥୀ ପ୍ରତିଦ୍ୱନ୍ଦିତା କରୁଛନ୍ତି ।

ପୁରୀ ଜିଲାପାଳ ଓ ଏସପି ବିଭିନ୍ନ ବୁଥ ପରିଦର୍ଶନ କରି ମତଦାନ ସମ୍ପର୍କରେ ସ୍ଥିତ ଅନୁଧ୍ୟାନ କରିଛନ୍ତି । ପିପିଲି ବ୍ଲକ ଓ ଏନଏସି ଅଞ୍ଚଳରେ ୧୦ ଟି ଓ ଡେଲାଙ୍ଗ ବ୍ଲକ ଅଞ୍ଚଳରେ ୧୦ ମତଦାନ କେନ୍ଦ୍ରରେ ଭୋଟରଙ୍କ ପାଇଁ ସ୍ଵତନ୍ତ୍ର ବ୍ୟବସ୍ଥା କରାଯାଇଛି ।