ପୁରୁଷ ବନ୍ଧ୍ୟାକରଣ ସଚେତନତା ରଥ

ବାଙ୍କୀ: ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଆନୁକୂଲ୍ୟରେ ପୁରୁଷ ବନ୍ଧ୍ୟାକରଣ ପକ୍ଷ ପାଳିତ ହୋଇଯାଇଛି। ଏହି ଅବସରରେ ସୁବର୍ଣ୍ଣପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିସରରୁ ପୁରୁଷ ବନ୍ଧ୍ୟା କରଣ ସଚେତନତା ରଥ ପରିକ୍ରମାର ଶୁଭାରମ୍ଭ ହୋଇଛି। ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକ୍ଷକ ଡାକ୍ତର ଅମରେଶ ସାହୁ ସବୁଜ ପତାକା ଦେଖାଇ ରଥର ଶୁଭାରମ୍ଭ କରିଛନ୍ତି। ଡାକ୍ତର ସତ୍ୟଜିତ ମହାପାତ୍ର, ଜନସ୍ୱାସ୍ଥ୍ୟ ସମ୍ପ୍ରସାରଣ ଅଧିକାରୀ ପ୍ରଦୀପ କୁମାର ସାହୁ, ସ୍ୱାସ୍ଥ୍ୟ ପରିଦର୍ଶକ ମାନଭଞ୍ଜନ ଦଳାଇ, ସନ୍ତୋଷ କୁମାର ସାହୁ, ଆଶିଷ କୁମାର ସାହୁଙ୍କ ସମେତ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ବହୁ ପଦାଧିକାରୀ ଉପସ୍ଥିତ ଥିଲେ।

ସୂଚନା ଅନୁଯାୟୀ ଚଳିତ ସପ୍ତାହରେ ୨୦ଗୋଟି ପଞ୍ଚାୟତ ଅଧିନ ସମସ୍ତ ସ୍ୱାସ୍ଥ୍ୟ ଆରୋଗ୍ୟ କେନ୍ଦ୍ର ଏବଂ ସ୍ୱାସ୍ଥ୍ୟ ଉପକେନ୍ଦ୍ରରେ ଏହି ରଥ ଯିବ ଏବଂ ସେଠାରେ ପୁରୁଷ ବନ୍ଧ୍ୟା କରଣର ସୁବିଧା ଓ ସୁଯୋଗ ସମ୍ପର୍କରେ ଜନସଚେତନତା ସୃଷ୍ଟି କରିବ। ଜନସଂଖ୍ୟା ବିଷ୍ଫୋରଣ ନିୟନ୍ତ୍ରଣ କରିବାରେ ପୁରୁଷ ବନ୍ଧ୍ୟାକରଣ ଅସ୍ତ୍ରୋପ୍ରଚାର ଏକ ସହଜ,ସୁରକ୍ଷିତ ଏବଂ ସହଜ ଉପାୟ ବୋଲି ଅଧିକ୍ଷକ ନିଜ ବାର୍ତ୍ତାରେ ସ୍ୱାସ୍ଥ୍ୟକର୍ମୀ ମାନଙ୍କୁ ଜନଜାଗରଣ କରିବା ପାଇଁ ଆହ୍ୱାନ ଦେଇଛନ୍ତି। ଏହି ପରୁଷ ବନ୍ଧ୍ୟାକରଣ ପାଇଁ ଉଚ୍ଛୁକ ବ୍ୟକ୍ତି ସରକାରୀ ପ୍ରୋତ୍ସାହନ ବାବଦରେ ୨୦୦୦ଟଙ୍କା ଅସ୍ତ୍ରୋପ୍ରଚାର ପରେ ନିଜ ଜମାଖାତାରେ ପାଇବେ ବୋଲି ଅନୁରୂପ ପ୍ରଚାର ପତ୍ରରେ ସୂଚନା ଦିଆଯାଇଛି। ଡିସେମ୍ବର ୨ତାରିଖରେ କଟକ ସିଟି ହସ୍ପିଟାଲରେ ଏହି ଅସ୍ତ୍ରୋପ୍ରଚାର ଜିଲ୍ଲାସ୍ତରରେ କରାଯାଉଥିବାରୁ ଜନସାଧାରଣ ସୁଯୋଗ ନେଇ ଜନବିଷ୍ପୋରଣ ରୋକିବାରେ ସହଯୋଗ କରିବା ପାଇଁ ନିବେଦନ କରାଯାଇଛି।