ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନକୁ ପ୍ରତିବାଦ, ନୀଳଗିରି କୋର୍ଟ ବର୍ଜନ କଲେ ଓକିଲ ସଂଘ

ନୀଳଗିରି ୨୯।୦୭: ନୀଳଗିରି କୋର୍ଟ ବର୍ଜନ କରିଛନ୍ତି ୨ଟି ଓକିଲ ସଂଘ । ଆଇନଜୀବୀଙ୍କୁ ମାଡ଼ ପ୍ରତିବାଦରେ କୋର୍ଟ ବର୍ଜନ କରିଛି ସଂଘ । ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନକୁ ପ୍ରତିବାଦ କରି ଏହି ଆନ୍ଦୋଳନ ଡ଼ାକରା ଦିଆଯାଇଛି । ଯଦି ଦାବି ପୂରଣ ନହୁଏ, ତେବେ ଆଗକୁ ଆନ୍ଦୋଳନ ଜୋରଦାର ହେବ ବୋଲି ସଂଘ ପକ୍ଷରୁ ସୂଚନା ଦିଆଯାଇଛି ।

ଖବର ଅନୁଯାୟୀ,ଆଇନଜୀବୀ ଧୀରେନ୍ଦ୍ର କୁମାର ଦାସଙ୍କୁ ପୋଲିସ ମାଡ଼ ମରିଥିଲେ । ଏନେଇ ସୋର ଥାନା ଅଧିକାରୀଣୀ ଓ ସଂପୃକ୍ତ ପୋଲିସ କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି ନେଇ ଏସ୍‌ପି ଓ ଆଇଜିଙ୍କ ନିକଟରେ ଅଭିଯୋଗ ହୋଇଥିଲା । ଇତିମଧ୍ୟରେ ଘଟଣାରେ ୨୦ରୁ ଅଧିକ ଦିନ ବିତିଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ । ଏହାର ପ୍ରତିବାଦ ସ୍ୱରୁପ ବାଲେଶ୍ୱର ଜିଲ୍ଲାର ଆଇନଜୀବୀମାନେ ଏକାଠି ହୋଇଛନ୍ତି ।

ଏପରିକି ଗୁରୁବାର ନୀଳଗିରି ବାର ଏସୋସିଏସନ ଓ ସବ ଡିଭିଜନାଲ ବାର ଏସୋସିଏସନ ପକ୍ଷରୁ ବିକ୍ଷୋଭ ପ୍ରଦର୍ଶନ କରିବା ସହ କୋର୍ଟ ବର୍ଜନ କରିଛନ୍ତି। ଅଗଷ୍ଟ ୨ ତାରିଖ ପର୍ଯ୍ୟନ୍ତ ଏହି ଆନ୍ଦୋଳନ ଚାଲିବ ବୋଲି ସଂଘ ସୂଚନା ଦେଇଛି । ସମୃକ୍ତ ପୋଲିସ ଅଧିକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନନିଅନ୍ତି,  ତାହେଲେ ଆଗକୁ ଆନ୍ଦୋଳନ ଉଗ୍ରରୂପ ନେବ ବୋଲି ୨ଟି ସଂଘ ଚେତାବନୀ ଦେଇଛନ୍ତି।