ଶିବସେନା ନେତାଙ୍କ ବିବୃତ୍ତିରେ ଅସନ୍ତୁଷ୍ଟ କଂଗ୍ରେସ, ଡାକିଲା ବୈଠକ

ଡେସ୍କ: ବିଦ୍ରୋହୀ ବିଧାୟକମାନେ ଚାହିଁଲେ ତାଙ୍କ ଦଳ ମହା ବିକାଶ ଆଗାଡି ସରକାର ଛାଡିବାକୁ ପ୍ରସ୍ତୁତ ବୋଲି ଶିବସେନା ନେତା ସଞ୍ଜୟ ରାଉତ କହିବା ପରେ କଂଗ୍ରେସ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ ଡାକିଛି। ସୂଚନାନୁସାରେ, ଶିବସେନା ନେତାଙ୍କ ବିବୃତ୍ତିରେ କଂଗ୍ରେସ ଅସନ୍ତୋଷ ପ୍ରକାଶ କରିଛି।

ବୈଠକରେ ବରିଷ୍ଠ କଂଗ୍ରେସ ନେତା ଏଚ୍.କେ ପାଟିଲ, ବାଲାସାହେବ ଥୋରାଟ, ନାନା ପଟୋଲେ ଏବଂ ଅଶୋକ ଚୌହାନଙ୍କ ସମେତ ଅନ୍ୟ ବରିଷ୍ଠ କଂଗ୍ରେସ ନେତାମାନେ ଅଂଶଗ୍ରହଣ କରୁଛନ୍ତି। ମହାରାଷ୍ଟ୍ର କଂଗ୍ରେସ ମୁଖ୍ୟ ନାନା ପାଟୋଲ କହିଛନ୍ତି ଯେ ରାଜ୍ୟରେ ବିଜେପିକୁ କ୍ଷମତାକୁ ଆସିବାକୁ ନ ଦେବା ପାଇଁ ଦଳ ଶିବସେନା ସହ ଅଛି।

ସେ କହିଛନ୍ତି ଯେ କଂଗ୍ରେସ ଆସ୍ଥା ଭୋଟର ସମ୍ମୁଖୀନ ହେବାକୁ ପ୍ରସ୍ତୁତ ଅଛି। ନାନା କହିଛନ୍ତି, ଆମେ ମହା ବିକାଶ ଅଗାଡି ସହିତ ଅଛୁ ଏବଂ ରହିବୁ। ଯଦି ଶିବସେନା କାହା ସହ ମେଣ୍ଟ କରିବାକୁ ଚାହେଁ, ତେବେ ଆମର କୌଣସି ଅସୁବିଧା ହେବ ନାହିଁ ବୋଲି ସେ କହିଛନ୍ତି।

ଅନ୍ୟ ପକ୍ଷରେ ସଂଞ୍ଜୟ ରାଉତ ଦାବି କରିଛନ୍ତି ଯେ ଗୌହାଟୀରେ ଥିବା ୨୧ ଜଣ ବିଧାୟକ ଶିବସେନା ସହ ଯୋଗାଯୋଗ କରିଛନ୍ତି ଏବଂ ମୁମ୍ବାଇ ଫେରିବା ପରେ ସେମାନେ ପାର୍ଟିରେ ସାମିଲ ହେବେ। ଏନସିପି ନେତା ଜୟନ୍ତ ପାଟିଲ ଟ୍ୱିଟ୍ କରି କହିଛନ୍ତି, ମହାରାଷ୍ଟ୍ର ବିକାଶ ଅଗାଡି ହେଉଛି ମହାରାଷ୍ଟ୍ରର ବିକାଶ ତଥା କଲ୍ୟାଣ ପାଇଁ ଏକ ସରକାର।

ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ କହିଛନ୍ତି ଯେ ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଏବଂ କେନ୍ଦ୍ରୀୟ ନେତାମାନେ ରାଜ୍ୟରେ ଦେଖାଦେଇଥିବା ରାଜନୈତିକ ଅସ୍ଥିରତା ଉପରେ ନଜର ରଖିଛନ୍ତି। ବିଦ୍ରୋହୀ ଶିବସେନା ନେତା ଏକନାଥ ସିନ୍ଦେ ଗୁରୁବାର ଦିନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଏକ ଚିଠି ଲେଖିଛନ୍ତି ଯେ ଏହା ହେଉଛି ବିଧାୟକଙ୍କ ମନୋଭାବ। ଚିଠି ଅନୁଯାୟୀ ଶିବସେନା ନେତାଙ୍କ ପାଖରେ ମୁଖ୍ୟମନ୍ତ୍ରୀଙ୍କ ବାସଭବନକୁ ଯିବାକୁ ଅନୁମତି ନାହିଁ। ମୁଖ୍ୟମନ୍ତ୍ରୀ କେବେ ବି ସଚିବାଳୟକୁ ଆସନ୍ତି ନାହିଁ, ଏହା ବଦଳରେ ସେ ତାଙ୍କ ବାସଭବନରେ ରହନ୍ତି। ମୁଖ୍ୟମନ୍ତ୍ରୀଙ୍କ ପାଖ ଲୋକମାନେ ସେମାନଙ୍କ ଫୋନ କଲ ଉଠନ୍ତି ନାହିଁ ବୋଲି ସେ ଲେଖିଛନ୍ତି।