ଜିଲ୍ଲାପାଳ ହେବ ତ ଏମିତି: ମାତ୍ର ଦୁଇ ଘଣ୍ଟାରେ ଦିବ୍ୟାଙ୍ଗ ପିଲାମାନଙ୍କୁ ଯୋଗାଇଦେଲେ ଦିବ୍ୟାଙ୍ଗ ସାର୍ଟିଫିକେଟ ସହ ଆୟୁଷ୍ମାନ କାର୍ଡ

ଅମ୍ବିକାପୁର: ଜିଲ୍ଲାପାଳଙ୍କୁ ଭେଟି ନିଜ ସମସ୍ୟା ଜଣାଇଲେ, ଆଉ ମାତ୍ର ଦୁଇ ଘଣ୍ଟାରେ ହେଲା ସମାଧାନ | ସରକାରୀ ଅଫିସରେ ଫାଇଲଟିଏ କିଭଳି ବର୍ଷ ବର୍ଷ ଧରି ପଡ଼ିରହେ, ସେକଥା ପ୍ରାୟ ସମସ୍ତେ ଜାଣିଥିବେ | କୌଣସି ଯୋଜନାର ଲାଭ ପାଇବାକୁ ଅନେକ ଦିନ ଅପେକ୍ଷା କରିବାକୁ ପଡିଥାଏ | କିନ୍ତୁ ଛତିଶଗଡ଼ର ସରଗୁଜା ଜିଲ୍ଲାର ଜିଲ୍ଲାପାଳ ଆଜି ଏମିତି କିଛି କରିଛନ୍ତି, ଯାହାକୁ ନେଇ ଚର୍ଚ୍ଚା ଜୋର ଧରିଛି | ବାସ୍ତବରେ ଆଜି ଏକ ଦମ୍ପତି ସେମାନଙ୍କ ତିନି ପିଲାଙ୍କ ସହ କଲେକ୍ଟରଙ୍କ ଅଫିସରେ ପହଞ୍ଚିଥିଲେ। ଉକ୍ତ ଦମ୍ପତି ସରଗୁଜା ଜିଲ୍ଲାପାଳ କୁନ୍ଦନ କୁମାରଙ୍କୁ ଭେଟିଥିଲେ ଏବଂ କଲେକ୍ଟରଙ୍କୁ କହିଥିଲେ ଯେ ତାଙ୍କର ତିନି ଜଣ ପିଲାଙ୍କ ଦିବ୍ୟାଙ୍ଗ ପ୍ରମାଣପତ୍ର ଏଯାଏଁ ମିଳିପାରିନାହିଁ |

ଦିବ୍ୟାଙ୍ଗ ପ୍ରମାଣପତ୍ର ସହ ଆୟୁଷ୍ମାନ କାର୍ଡ ମଧ୍ୟ ତିଆରି ହୋଇନାହିଁ | ଏହା ପରେ କଲେକ୍ଟର ତୁରନ୍ତ ତହସିଲଦାରଙ୍କୁ ଡାକିଥିଲେ ଏବଂ ତାଙ୍କ ସହ ସମସ୍ତଙ୍କୁ ମେଡିକାଲ କଲେଜ ହସ୍ପିଟାଲକୁ ପଠାଇଲେ | ଆଉ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ମାତ୍ର ଦୁଇ ଘଣ୍ଟା ମଧ୍ୟରେ ହସ୍ପିଟାଲରେ ତିନି ଜଣ ପିଲାଙ୍କୁ ଦିବ୍ୟାଙ୍ଗ ପ୍ରମାଣପତ୍ର ମିଳିଥିଲା ​​ଏବଂ ଆୟୁଷ୍ମାନ କାର୍ଡ ମଧ୍ୟ ତିଆରି କରାଯାଇଥିଲା | ତହସିଲଦାର ଭୂଷଣ ମଣ୍ଡଭୀ କହିଛନ୍ତି ଯେ ଦିବ୍ୟାଙ୍ଗ ପ୍ରମାଣପତ୍ର ସହ ଆୟୁଷ୍ମାନ କାର୍ଡ ପ୍ରସ୍ତୁତ କରାଯାଇଥିବାବେଳେ ଏହା ପରେ ଜନ ଧନ ଯୋଜନାରେ ବ୍ୟାଙ୍କ ଆକାଉଣ୍ଟ ଖୋଲାଯିବ |

ସେହିପରି ସରକାରଙ୍କର ଯାହା ଯାହା ଯୋଜନା ଦିବ୍ୟାଙ୍ଗ ଶିଶୁମାନଙ୍କ ପାଇଁ ଅଛି ସେ ସବୁ ମିଳିବ ବୋଲି ତହସିଲଦାର କହିଛନ୍ତି | ତେବେ ବାରମ୍ବାର ସରକାରୀ ଅଫିସ ଧାଉଁଥିଲେ ବି ପ୍ରମାଣପତ୍ରଟିଏ ମିଳିନଥିବାବେଳେ ଜିଲ୍ଲାପାଳଙ୍କ ଏହି ଉଦ୍ୟମକୁ ଉକ୍ତ ଦମ୍ପତି ପ୍ରଶଂସା କରିଥିଲେ |