ଝିଲି, ଶ୍ରୀୟଙ୍କା, ଦେବାଶିଷ, ବିଷ୍ଣୁ, ବେଣୁଧର, ଆର୍‌ଏସ୍‌ପି ପୁରସ୍କୃତ

ଭୁବ​ନେ‌ଶ୍ବର : ସୋମବାର ଜାତୀୟ କ୍ରୀଡ଼ା ଦିବସରେ ରାଜ୍ୟର ବିଶିଷ୍ଟ କ୍ରୀଡ଼ାବିତ୍‌, ପ୍ରଶିକ୍ଷକ ଓ କ୍ରୀଡ଼ା ସାମ୍ବାଦିକଙ୍କୁ ବିଜୁ ପଟ୍ଟନାୟକ କ୍ରୀଡ଼ା ପୁରସ୍କାର-୨୦୨୧ ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଲୋକସେବା ଭବନରେ ଆୟୋଜିତ ସ୍ବତନ୍ତ୍ର ଉତ୍ସବରେ ଭାରୋତ୍ତୋଳିକା ଝିଲି ଦଳବେହେରା ଓ ସୁଟର ଶ୍ରୀୟଙ୍କା ଷଡ଼ଙ୍ଗୀ ଯୁଗ୍ମ ଭାବେ ବର୍ଷର ଶ୍ରେଷ୍ଠ କ୍ରୀଡ଼ାବିତ୍‌ ପୁରସ୍କାର ପାଇଛନ୍ତି। ଉଭୟଙ୍କୁ ୩ ଲକ୍ଷ ଟଙ୍କା, ମାନପତ୍ର ଓ ଟ୍ରଫି ପ୍ରଦାନ କରା ଯାଇଥିଲା। ରାଜ୍ୟର ପ୍ରଥମ ଅନ୍ତର୍ଜାତୀୟ କ୍ରିକେଟର ଦେବାଶିଷ ମହାନ୍ତିଙ୍କୁ କ୍ରୀଡ଼ା କ୍ଷେତ୍ରରେ ଜୀବନବ୍ୟାପୀ ସାଧନା ପୁରସ୍କାର ପ୍ରଦାନ କରାଯାଇଛି। ଦେବାଶିଷ ୩ ଲକ୍ଷ ଟଙ୍କା, ମାନପତ୍ର ଓ ଟ୍ରଫି ଗ୍ରହଣ କରିଥିଲେ। ଶ୍ରେଷ୍ଠ ପ୍ରଶିକ୍ଷକ ଭାବେ ପାରା ଦୌଡ଼କୁଦ ପ୍ରଶିକ୍ଷକ ବିଷ୍ଣୁ ପ୍ରସାଦ ମିଶ୍ର ୧ ଲକ୍ଷ ଟଙ୍କା, ମାନପତ୍ର ଓ ଟ୍ରଫି ପାଇଥିଲେ।
ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ଆୟୋଜିତ ଉତ୍ସବରେ କ୍ରୀଡ଼ା ସାମ୍ବାଦିକତାରେ ଉତ୍କର୍ଷତା ପାଇଁ ଦୈନିକ ‘ସମାଜ’ର ବେଣୁଧର ଦାସ ଶ୍ରେଷ୍ଠ କ୍ରୀଡ଼ା ସାମ୍ବାଦିକ ଭାବେ ୫୦ ହଜାର ଟଙ୍କା ମାନପତ୍ର ଓ ଟ୍ରଫି ପାଇଥିଲେ। କ୍ରୀଡ଼ା ପ୍ରୋତ୍ସାହନ କ୍ଷେତ୍ରରେ ଉଲ୍ଲେଖନୀୟ ଅବଦାନ ଲାଗି ରାଉରକେଲା ଷ୍ଟିଲ୍‌ ପ୍ଲାଣ୍ଟ (ଆର୍‌ଏସ୍‌ପି)କୁ ପୁରସ୍କୃତ କରାଯାଇଛି। ଆର୍‌ଏସ୍‌ପିର ନିର୍ଦେଶକ ଅତନୁ ଭୌମିକ ୧ ଲକ୍ଷ ଟଙ୍କା, ମାନପତ୍ର ଓ ଟ୍ରଫି ଗ୍ରହଣ କରିଥିଲେ। ଭାରୋତ୍ତୋଳିକା ଝିଲି ଦଳବେହେରା ଏସିଆନ ଚମ୍ପିଆନସିପ୍‌, ରାଜ୍ୟଗୋଷ୍ଠୀ ଚମ୍ପିଆନସିପ, ଦକ୍ଷିଣ ଏସୀୟ କ୍ରୀଡ଼ା, ବିଶ୍ବ ଜୁନିୟର ଭାରୋତ୍ତୋଳନ ଚମ୍ପିଆନସିପ ଆଦିରେ ପଦକ ବିଜୟୀ ହୋଇଛନ୍ତି। ସେହିପରି ସୁଟର ଶ୍ରୀୟଙ୍କା ମଧ୍ୟ ଜାତୀୟ ଓ ଅନ୍ତର୍ଜାତୀୟ ସ୍ତରରେ ପଦକ ବିଜୟୀ ହୋଇଛନ୍ତି। ୪୫ଟି ଦିନିକିଆ ଓ ୨ଟି ଟେଷ୍ଟ ମ୍ୟାଚ୍‌ ଖେଳିଥିବା ଦେବାଶିଷ ଏବେ ଜାତୀୟ ସିନିୟର ମନୋନୟନ କମିଟି ସଦସ୍ୟ ରହିଛନ୍ତି। ପାରା ଦୌଡ଼କୁଦ ପ୍ରଶିକ୍ଷକ ବିଷ୍ଣୁ ପ୍ରସାଦ ମିଶ୍ରଙ୍କ ପ୍ରଶିକ୍ଷଣରେ ଜୟନ୍ତୀ ବେହେରାଙ୍କ ଭଳି ଅନ୍ତର୍ଜାତୀୟ ପଦକ ବିଜେତା ପାରା ଧାବିକା ସୃଷ୍ଟି ହୋଇଛନ୍ତି।