ଅଟୋ ଚାଳକଙ୍କ ପାଇଁ କାଳ ହେଲା କରୋନା

ରାଜଧାନୀ ଛାତି ଉପରେ ପରିବାର ସହ ବସବାସ କରିବା କେତେ ବ୍ୟୟସାପେକ୍ଷ ତାହା ଊଣା ଅଧିକେ ପ୍ରାୟ ସଭିଙ୍କୁ ଜଣା । ଆଉ ଏ ମହାମାରୀ ଏବଂ ତାଲା ବନ୍ଦ ସ୍ଥିତିରେ ସବୁକିଛି ଠପ୍ ହୋଇଥିବା ବେଳେ ଏକ ଅଟୋ ଚାଳକର ସ୍ଥିତି ଥରେଅନୁମାନ କରନ୍ତୁ । ଏମିତି ଜଣେ ବ୍ୟକ୍ତି ହେଉଛନ୍ତି ଉର୍ମିଳା ନାୟକ, ବୟସ ପାଖାପାଖି ୫୫ ଛୁଇଁଲାଣି। ପରିବାର କହିଲେ ନିଜ ଝିଅ ଜ୍ୱାଇଁଙ୍କ ସହ ଭୁବନେଶ୍ୱର ବିଶ୍ଵେଶ୍ୱର ବସ୍ତିରେ ବସବାସ କରନ୍ତି। ସମ୍ବଳ କହିଲେ ଋଣରେ କରିଥିବା ଅଟୋ । ଅଟୋ ଦୀର୍ଘ ଦିନ ଧରି ପଡି ରହିଛି , ଚକରେ କଳଙ୍କି ବି ଲାଗିଗଲାଣି। ଉର୍ମିଳାଙ୍କ ଜ୍ୱାଇଁ ଅଟୋ ଚଲେଇଲେ ଘରେ ଚୁଲି ଜଳେ। ମାସିକ ଘର ଖର୍ଚ୍ଚ, ଉର୍ମିଳାଙ୍କ ପାଇଁ ଔଷଧ ସହ ଅଟୋ ଋଣ କିସ୍ତି ବି ସୁଝିବାକୁ ଅଛି । ଦୀର୍ଘଦିନ ଧରି ଅଟୋ ଚଳାଚଳ କରୁନଥିବାରୁ କଷ୍ଟ ଆହୁରି ବଢ଼ିଯାଇଛି। ଅଟୋ ବନ୍ଦ ହେବା ପରେ ଜ୍ୱାଇଁ ମଜୁରୀ କାମ କଲେ ଘରେ ଚୁଲି ଜଳୁଛି। କରୋନା ଯେଉଁ ଯନ୍ତ୍ରଣା ଦେଇଯାଇଛି ସେଥିରେ ଅଣ୍ଟା ସଳଖି ଛିଡ଼ା ହେବା ଏମାନଙ୍କ ଲାଗି ମୁସ୍କିଲ ହୋଇ ପଡ଼ିଛି।