ଓଡ଼ିଶା ରାଜ୍ୟ ଜନଜାତି ସଂଗ୍ରହାଳୟକୁ ଭର୍ଚୁଆଲ୍‌ ଟୁର, ମାଲକାନଗିରିର ଦିଦାୟୀ ଜନଜାତିଙ୍କ ଜୀବନଶୈଳୀ ଓ ସଂସ୍କୃତି

ଦିଦାୟୀ ଜନଜାତି ସଂପ୍ରଦାୟ କେବଳ ଓଡ଼ିଶାରେ ବସବାସ କରୁଥିବାର ଦେଖାଯାଏ। ଅତୀତରେ ଦିଦାୟୀମାନେ ନିଜକୁ ଗଁତ୍ରେ ଭାବେ ମାନୁଥିଲେ। ଓଡ଼ିଶାର ମାଲକାନଗିରି ଜିଲ୍ଲାର କୋଣ୍ଡାକାମ୍‌ବେରୁ ପାର୍ବତ୍ୟାଞ୍ଚଳରେ ଥିବା ପୂର୍ବାଞ୍ଚଳ ଘାଟରେ ଦିଦାୟୀମାନେ ବସବାସ କରିଥାନ୍ତି। ସେମାନଙ୍କର ସଂଖ୍ୟା ଖୁବ୍‌ କମ୍‌। ସେମାନେ ମୁଖ୍ୟତଃ ପୋଡ଼ୁଚାଷ ଓ ଆଦ୍ରଭୂମିରେ ଚାଷ ମଧ୍ୟ କରିଥାନ୍ତି। ଜଙ୍ଗଲଜାତ ଦ୍ରବ୍ୟସଂଗ୍ରହ ଓ ଉଦ୍ୟାନ କୃଷିରୁ ସେମାନେ ଗୁଜୁରାଣ ମେଣ୍ଟାଇଥାନ୍ତି। ସେମାନଙ୍କର କାଳ୍ପନିକ ମତବାଦ ଓ କିମ୍ବଦନ୍ତୀ ତଥ୍ୟଗୁଡ଼ିକ ପ୍ରାୟତଃ ବଣ୍ଡା ଜନଜାତିଙ୍କର ସଂପର୍କକୁ ଦର୍ଶାଇଥାଏ। ଦିଦାୟୀ ଜନଜାତିମାନେ ଏକାଧିକ ଦେବଦେବୀଙ୍କୁ ପୂଜା କରିଥାନ୍ତି। ସେମାନେ ଧରିତ୍ରୀ ମାତାଙ୍କୁ ବିଶ୍ୱାସ କରିବା ସହିତ ବର୍ଷସାରା ବିଭିନ୍ନ ପର୍ବପର୍ବାଣି ପାଳନ କରିଥାନ୍ତି।