April 17, 2024

Satya News

odia news channel

ବିଜେପି ନେତାଙ୍କ ଶାଳକଙ୍କୁ ଛାଡ଼ି ଦେଇଛି ଏନ୍‌ସିବି: ମାଲିକ

 

ମୁମ୍ବଇ: ମହାରାଷ୍ଟ୍ରର କ୍ୟାବିନେଟ୍‌ ମନ୍ତ୍ରୀ ତଥା ବରିଷ୍ଠ ଏନ୍‌ସିପି ନେତା ନୱାବ ମାଲିକ ଆର୍ଯ୍ୟନ୍‌ ଖାଁଙ୍କ ମାଦକ ପାର୍ଟି ମାମଲାରେ ଶୁକ୍ରବାର ଆଉ ଏକ ବିସ୍ଫୋରକ ସୂଚନା ଦେଇଛନ୍ତି। ଜଣେ ବରିଷ୍ଠ ବିଜେପି ନେତାଙ୍କ ଶାଳକଙ୍କୁ ଏହି ମାମଲାରୁ ଏନ୍‌ସିବି ଛାଡ଼ି ଦେଇଥିବା ସେ ଦାବି କରିଛନ୍ତି। ଶନିବାର ସାମ୍ବାଦିକ ସମ୍ମିଳନୀ ମାଧ୍ୟମରେ ସମ୍ପୃକ୍ତ ବିଜେପି ନେତା ଓ ତାଙ୍କ ଶାଳକଙ୍କ ସମ୍ପର୍କରେ ବିସ୍ତୃତ ବିବରଣୀ ପ୍ରଦାନ କରିବେ ବୋଲି ମାଲିକ ଘୋଷଣା କରିଛନ୍ତି। ଇତିମଧ୍ୟରେ ଆୟକର ବିଭାଗ ପକ୍ଷରୁ ବରିଷ୍ଠ ଏନ୍‌ସିପି ନେତା ତଥା ରାଜ୍ୟ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବ୍ୟବସାୟ ପ୍ରତିଷ୍ଠାନ ଉପରେ ଚଢ଼ଉ କରାଯାଇଛି। ଏହି ଚଢ଼ଉର ଦିନକ ପରେ ମାଲିକ ଏପରି ଆକ୍ରମଣ ଆରମ୍ଭ କରିଛନ୍ତି।

ମାଲିକ ଏବେ ଏନ୍‌ସିବି ବିରୋଧରେ ନୂଆ ଅଭିଯୋଗ ଆଣିଛନ୍ତି ଯେ ଏନ୍‌ସିବି ମୁଖ୍ୟ ସମୀର ୱନ୍‌ଖେଡେ ଚଢ଼ଉ ପରେ ପରେ ୮ରୁ ୧୦ ଜଣଙ୍କୁ ଧରାଯାଇଥିବା କହିଥିଲେ। ଏବେ ୮ଜଣଙ୍କୁ ଧରି କାରାଗାରରେ ଭର୍ତ୍ତି କରିଥିବାବେଳେ ଆଉ ଦୁଇ ଜଣ କୁଆଡ଼େ ଗଲେ ? ଯେଉଁ ଦୁଇ ଜଣଙ୍କୁ ୱାନ୍‌ଖେଡେ ଛାଡ଼ି ଦେଇଛନ୍ତି ସେମାନଙ୍କ ମଧ୍ୟରେ ଜଣେ ବରିଷ୍ଠ ବିଜେପି ନେତାଙ୍କ ଶାଳକ ଅଛନ୍ତି। ବିଜେପି ଚାପରେ ଏନ୍‌ସିବି ମାଦକ ପାର୍ଟି ନାଟକ ମଞ୍ଚସ୍ଥ କରିଛି ଏବଂ ଏହା ସାମ୍ପ୍ରତିକ ଘଟଣାରୁ ସ୍ପଷ୍ଟ ବୋଲି ସେ କହିଛନ୍ତି। ଅପରପକ୍ଷରେ ଆର୍ଯ୍ୟନ୍‌ଙ୍କ ମାଦକ ପାର୍ଟି ଉପରେ ଏନ୍‌ସିବି ଚଢ଼ଉ ବେଳେ ଓ ଏନ୍‌ସିବି କାର୍ଯ୍ୟାଳୟରେ ଅଭିଯୁକ୍ତଙ୍କ ସହ ବିଜେପି ନେତାଙ୍କ ଉପସ୍ଥିତି ନେଇ ମାଲିକ ଦୁଇ ଦିନ ପୂର୍ବେ ଯେଉଁ ପ୍ରଶ୍ନ ଉଠାଇଥିଲେ ସେ ନେଇ ମାଲିକଙ୍କ ବିରୋଧରେ ସମ୍ପୃକ୍ତ ଦୁଇ ନେତା କେପି ଗୋସାବି ଓ ମନୀଷ ବଂଶୁଆଲି ମାନହାନି ମକଦ୍ଦମା ଧମକ ଦେଇଛନ୍ତି।
Spread the love