ଲଘୁଚାପ ବର୍ଷା ଉଜାଡି ଦେଲା ଫସଲ

ସୁଆଣ୍ଡୋ: ଆଉ ମାସକ ପରେ ଚାଷୀ ଅମଳ କରିଥାନ୍ତା ଧାନ ଫସଲ। ସେହିପରି କୋବି, ବିନସ୍, ଆଳୁ, ଝୁଡଙ୍ଗ, କାକୁଡ଼ି, ଜହ୍ନି କୋଶଳା ଶାଗ, ଧନିଆ ଆଦି ଅର୍ଥକାରୀ ଫସଲ। ତେବେ ଦଇବ ସହିଲା ନାହିଁ। ପୁରୀ ଜିଲା ସତ୍ୟବାଦୀ ଅଞ୍ଚଳରେ ଦୁଇଦିନ ଧରି ଲାଗି ରହିଛି ଲଘୁଚାପ ଜନିତ ବର୍ଷା। ଏହି ଲଘୁଚାପ ଜନିତ ବର୍ଷା ଫସଲ ଉଜାଡ଼ି ଦେଇଥିବା ଚାଷୀମାନେ ପ୍ରକାଶ କରିଛନ୍ତି।
ବର୍ତ୍ତମାନ ଧାନ ବାହାରି ଫୁଲ ଉଡାଇବା ବେଳେ ବର୍ଷା ମାଡରେ ଆଣ୍ଠୁଏ ପାଣିରେ ବିଲରେ ଲୋଟୁଛି। ଧାନ ଶିସାରେ ବର୍ଷା ପାଣି ପଶିଯିବାରୁ ଧାନ ସବୁ ଅଗାଡି ହୋଇଯିବ ବୋଲି ପୂର୍ଣ୍ଣ ଚନ୍ଦ୍ର ବେହେରା, ପ୍ରହଲାଦ ସ୍ୱାଇଁ, ଜଟିଆ ମଳିକ ଓ ଜଗା ପରିଡା ପ୍ରମୁଖ ଚାଷୀ ଆଶଙ୍କା ପ୍ରକାଶ କରିଛନ୍ତି। ରବି ଋତୁରେ ଚାଷ କରିବାକୁ ୨ ହଜାର ଟଙ୍କା କାଳିଆ ଯୋଜନାରେ ସରକାରଙ୍କ ପକ୍ଷରୁ ଯୋଗାଇ ଦିଆ ଯାଇଥିଲା।

ଅକ୍ଟୋବର ମାସ ଅଧାରୁ ବର୍ଷା ଛାଡି ଯାଇଥିବାରୁ ପନିପରିବା ସହିତ ଲଟାଜାତୀୟ ଫସଲ ଓ ଶାଗ ଆଦି ବିଲରେ ଚାଷୀମାନେ ଲଗାଇ ଥିଲେ। କରୋନା କାଳରେ ନିଜକୁ ବଞ୍ଚାଇ ବିଲରେ କରିଥିବା ଫସଲ ଆଖି ଆଗରେ ଉଜୁଡ଼ି ଯିବା ଦେଖି ସତ୍ୟବାଦୀର ଚାଷୀକୂଳ ହତାଶ ହୋଇ ପଡିଛନ୍ତି ବୋଲି ଜିଲାପରିଷଦ ସଭ୍ୟ ପ୍ରହଲାଦ ଘଟୁଆରୀ, ସରପଞ୍ଚ ରସ୍ମିତା ପ୍ରଧାନ, ତ୍ରିନାଥ ମହାପାତ୍ର, ସମିତି ସଭ୍ଯ ପ୍ରଶାନ୍ତ ମହାପାତ୍ର ପ୍ରମୁଖ କହିଛନ୍ତି।