ଆଠଗଡ ପ୍ରସିଦ୍ଧ ପଞ୍ଚୁଦୋଳ ଯାତ୍ରାରେ ଯୋଗଦେଲେ ୪୮ ବିମାନ

ରାତି ୧୦ଟାରେ ରାଧାଗୋବିନ୍ଦ ମନ୍ଦିର ନିକଟରୁ ଏକ ଭବ୍ୟ ଶୋଭାଯାତ୍ରାରେ ବାଜା, ବାଣ, ରୋଷଣୀ ସହିତ ୨୦ଦଳ ସଂକୀର୍ତ୍ତନ ମଣ୍ଡଳ, ୫ ମଣ୍ଡଳୀ ବାଡି ଲଉଡି ଦଳ ସଂକୀର୍ତ୍ତନ ଓ ଲଉଡି ଖେଳ ମଧ୍ୟରେ ୪୮ଟି ଯାକ ବିମାନ ସହର ପରିକ୍ରମା କରି ଯଞ୍ଜନାରାୟଣ ମନ୍ଦିରରେ ପହଞ୍ଚିବା ପରେ ସେଠାରେ ରାଜଭୋଗ ଲାଗି ହୋଇଥିଲା। ସେଠାରୁ ପୁନଃ ବିମାନରୂଢ ଦିଅଁମାନଙ୍କର ଶୋଭାଯାତ୍ରା ରାଧାନାଥପୁର ଶାସନ ଓ ଗୋପବନ୍ଧୁ ଛକ ଦେଇ ଦୁର୍ଗାବଜାରସ୍ଥିତ ଦୋଳମଣ୍ଡପ ନିକଟକୁ ଯିବା ପରେ ବିମାନଗୁଡିକ ଅସ୍ଥାୟୀ ଚାରମାଳରେ ବିଶ୍ରାମ ନେଇଥିଲେ। ଗୁରୁବାର ସକାଳ ୭.୩୦ମିନିଟରେ ପୁନଃ ବିମାନରୂଢ ଦିଅଁଙ୍କୁ ଗୋପାଳ ଭାଇମାନେ ଆନନ୍ଦରେ କାନେ୍ଧଇ ଏକ ଶୋଭାଯାତ୍ରାରେ ଆସି ଯଜ୍ଞନାରାୟଣ ମନ୍ଦିରଠାରେ ପହଞ୍ଚିଥିଲେ। ସେଠାରେ ଆୟୋଜିତ ଏକ ସମ୍ବର୍ଦ୍ଧନା ସଭାରେ ଉପଜିଲ୍ଲାପାଳ ଶ୍ରୀ ସ୍ୱାଇଁ ବିମାନ ବାହକ ଗୋପାଳ ଭାଇ ଏବଂ ପୂଜକମାନଙ୍କୁ ସମ୍ବର୍ଦ୍ଧିତ କରିଥିଲେ। ଆୟୋଜିତ ଏହି ସମ୍ବର୍ଦ୍ଧନା ସଭାରେ ସଂକୀର୍ତ୍ତନ ଗୁରୁ ତଥା ଦେବୋତ୍ତର ଉପଦେଷ୍ଟା ମଣ୍ଡଳୀ ସଦସ୍ୟ ଅଜୟ କୁମାର ଦାସ, ପଣ୍ଡିତ ମାନସ ପଣ୍ଡା, ସାମ୍ବାଦିକ ଲଲାଟେନ୍ଦୁ ସେନାପତିଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦେଇ ଆଠଗଡର ଏହି ପ୍ରାଚୀନ ପରମ୍ପରା ସଂପର୍କରେ ନିଜର ଅଭିମତ ରଖିଥିଲେ। ଦେବୋତ୍ତର ସୁପରଭାଇଜର ଭବାନୀ ଶଙ୍କର ପଣ୍ଡା ଏବଂ ଅନ୍ୟ ସହଯୋଗୀ ଏହି ଯାତ୍ରା ପରିଚାଳନାରେ ପ୍ରମୁଖ ଭୂମିକା ଗ୍ରହଣ କରିଥିଲେ।