ଖାଲି ପଡ଼ିଛି ୬୦% ସିଟ୍, ସ୍ବତନ୍ତ୍ର ଓଜେଇଇ କରିବାକୁ ସଚିବଙ୍କୁ ଚିଠି

ସଂଘର ସାଧାରଣ ସମ୍ପାଦକ ବିନୋଦ ଦାଶ କହିଛନ୍ତି, ବି.ଟେକ ନାମଲେଖା ପ୍ରକ୍ରିୟାକୁ ସର୍ବୋଚ୍ଚ ନ୍ୟାୟାଳୟ ଡିସେମ୍ବର ୩୧ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏହାରି ଭିତରେ ବିଭାଗ ସ୍ବତନ୍ତ୍ର ଓଜେଇଇ କରି ୩୧ ତାରିଖ ସୁଦ୍ଧା ନାମଲେଖା ପ୍ରକ୍ରିୟା ସାରିବାକୁ ସଂଘ ଦାବି କରିଛି। ୩ ଥର କାଉନସେଲିଂ କରାଯିବା ପରେ ମଧ୍ୟ ୬୦ ପ୍ରତିଶତ ସିଟ ଖାଲି ପଡିଛି। ଚଳିତ ବର୍ଷ ସ୍ବତନ୍ତ୍ର ଓଜେଇଇ ଦେବାକୁ ହଜାର ହଜାର ଛାତ୍ରଛାତ୍ରୀ ପରୀକ୍ଷା କେନ୍ଦ୍ରକୁ ଆସି ପାରି ନ ଥିଲେ। ଦ୍ବିତୀୟ ଲହର ପ୍ରଭାବ, ବନ୍ୟା ଏବଂ ବାତ୍ୟା ଯୋଗୁଁ ବିଦ୍ୟାର୍ଥୀ ପରୀକ୍ଷା ଦେବାକୁ ଆସି ପାରିଲେ ନାହିଁ। ପରୀକ୍ଷାରୁ ବଞ୍ଚିତ ଛାତ୍ରଛାତ୍ରୀଙ୍କୁ ସୁଯୋଗ ଦେବା ପାଇଁ ଆଉ ଥରେ ସ୍ବତନ୍ତ୍ର ଓଜେଇଇ କରାଯାଉ। ସ୍ବତନ୍ତ୍ର ଓଜେଇଇ ପାଇଁ ଡିସେମ୍ବର ୨୧ରେ ବିଜ୍ଞାପନ ପ୍ରକାଶ କରି ୨୩ରୁ ୨୪ ତାରିଖ ପଞ୍ଜୀକରଣ କରିବାକୁ ଛାତ୍ରଛାତ୍ରୀଙ୍କୁ ସମୟ ଦିଆଯାଉ। ୨୫ରେ ଛାତ୍ରଛାତ୍ରୀ ପ୍ରବେଶ ପତ୍ର (ଆଡମିଟ କାର୍ଡ) ଡାଉନଲୋଡ କରିପାରିବେ। ୨୬ ଏବଂ ୨୭ ତାରିଖରେ ପରୀକ୍ଷା କରି ୨୯ ତାରିଖରେ ଫଳ ପ୍ରକାଶ କରାଯାଇ ପାରିବ। ୩୦ ଏବଂ ୩୧ ତାରିଖ ଦୁଇଦିନ ମହାବିଦ୍ୟାଳୟ ସ୍ତରରେ ନାମଲେଖାଇବାକୁ ଛାତ୍ରଛାତ୍ରୀଙ୍କୁ ଅନୁମତି ଦିଆଯାଇ ପାରିବ। ଯଦ୍ଦ୍ବାରା ଇଞ୍ଜିନିୟରିଂ ମହାବିଦ୍ୟାଳୟରେ ଖାଲି ପଡିଥିବା ସିଟ ପୂରଣ ହୋଇ ପାରିବ। ଛାତ୍ରଛାତ୍ରୀ ମଧ୍ୟ ବି.ଟେକ ପାଠ ପଢିପାରିବେ ବୋଲି ସଂଘ ବିଭାଗ ପାଖରେ ଦାବି ଉପସ୍ଥାପନ କରିଛି।