ତୱଙ୍ଗ: ଅରୁଣାଚଳ ପ୍ରଦେଶ ସୀମାରେ ପ୍ରାୟ ୨୦୦ ଚୀନ୍ ସେନାଙ୍କ ଅନୁପ୍ରବେଶ ଉଦ୍ୟମକୁ ଭାରତୀୟ ଯବାନ ପଣ୍ଡ କରିଦେଇଛନ୍ତି। ତିବ୍ବତରୁ ଚୀନ୍ର ପିପୁଲ୍ସ ଲିବରେସନ୍ ଆର୍ମି (ପିଏଲଏ) ପହରା ଦଳର ଯବାନମାନେ ଏହି ସୀମାନ୍ତ ରାଜ୍ୟର ତୱଙ୍ଗ ଅଞ୍ଚଳ (ସେକ୍ଟର)କୁ ବାସ୍ତବ ନିୟନ୍ତ୍ରଣ ରେଖା (ଏଲଏସି)ର ବୁମ୍ ଲା ଏବଂ ୟାଙ୍ଗସେ ବାଟ ଦେଇ ବ୍ରହ୍ମପୁତ୍ର ଅବବାହିକାକୁ ପ୍ରବେଶ କରିବା ସହ ଭାରତୀୟ ବଙ୍ଗର ଭଙ୍ଗାରୁଜା ଉଦ୍ୟମ ଯୋଜନା କରୁଥିବାବେଳେ ଭାରତୀୟ ଯବାନ ସେମାନଙ୍କର କଡ଼ା ମୁକାବିଲା କରିଥିଲେ। ତୱଙ୍ଗ ସେକ୍ଟର ସାମରିକ ଦୃଷ୍ଟିକୋଣରୁ ଅତ୍ୟନ୍ତ ଗୁରୁତ୍ବପୂର୍ଣ୍ଣ ହୋଇଥିବାରୁ ଭାରତୀୟ ଯବାନ ସେଠାରେ ସଜାଗ ଥିଲେ। ଚୀନ୍ର କିଛି ସୈନିକଙ୍କୁ ସେମାନେ ଦୀର୍ଘ ସମୟ ପର୍ଯ୍ୟନ୍ତ ଅଟକ ରଖିଥିଲେ। ପରେ ସ୍ଥାନୀୟ ସେନା କମାଣ୍ଡରସ୍ତରରେ ଆଲୋଚନା କରାଯାଇ ସେମାନଙ୍କୁ ମୁକ୍ତ କରାଯାଇଥିଲା। ଏହି ଘଟଣାରେ ଭାରତୀୟ ପକ୍ଷର କୌଣସି କ୍ଷତି ଘଟି ନାହିଁ। ଗତ ସପ୍ତାହରେ ଏହି ଘଟଣା ଘଟିଥିଲେ ମଧ୍ୟ ସରକାରୀ ଭାବେ କୌଣସି ସୂଚନା ଦିଆଯାଇ ନାହିଁ। ଅପରପକ୍ଷରେ ଚୀନ୍ ବୈଦେଶିକ ମନ୍ତ୍ରଣାଳୟ ଏ ସମ୍ପର୍କରେ କିଛି ଜାଣି ନ ଥିବା ସଫେଇ ଦେଇଛି।
ଉଲ୍ଲେଖଯୋଗ୍ୟ ଯେ ଅରୁଣାଚଳ ପ୍ରଦେଶକୁ ଚୀନ୍ ନିଜର ବୋଲି ଏବେ ସୁଦ୍ଧା ଦାବି କରିଆସୁଛି। ୧୯୬୨ ଯୁଦ୍ଧ ପ୍ରାରମ୍ଭରେ ଚୀନ୍ ସେନା ତୱଙ୍ଗକୁ ଦଖଲ କରିନେଇଥିଲେ ମଧ୍ୟ ପରେ ଭାରତ ଏହାକୁ ମୁକୁଳାଇବାରେ ସମର୍ଥ ହୋଇଥିଲା। ସେବେଠାରୁ ଚୀନ୍ ଏହାକୁ ବୃହତ୍ ତିବ୍ବତର ଅଂଶବିଶେଷ ଏବଂ ଅରୁଣାଚଳ ପ୍ରଦେଶକୁ ଦକ୍ଷିଣ ତିବ୍ବତ ଭାବେ ଦାବି କରିଆସୁଛି। ଅରୁଣାଚଳ ସଂଲଗ୍ନ ଭାରତ-ଚୀନ୍ ସୀମାନ୍ତ ଯଥାଯଥ ଭାବେ ଚିହ୍ନଟ ହୋଇ ନ ଥିବାରୁ ବିବାଦ ଲାଗିରହୁଛି ଏବଂ ବିଭିନ୍ନ ସମୟରେ ଆଇନଶୃଙ୍ଖଳା ପରିସ୍ଥିତି ଉପୁଜୁଛି। ସେଥିପାଇଁ ଉଭୟ ରାଷ୍ଟ୍ରର ସେନା ସେଠାରେ ନିୟମିତ ପହରା ଦେଉଛନ୍ତି। ୨୦୧୬ରେ ୟାଙ୍ଗସେଠାରେ ୨୦୦ରୁ ଅଧିକ ଚୀନ୍ ସେନା ଭାରତୀୟ ଅଞ୍ଚଳକୁ ଅନୁପ୍ରବେଶ କରିଥିଲେ। କିଛି ଘଣ୍ଟା ପରେ ଭାରତୀୟ ଯବାନ ସେମାନଙ୍କୁ ତଡ଼ିବାରେ ସମର୍ଥ ହୋଇଥିଲେ। ୨୦୧୧ରେ ଚୀନ୍ ସେନା ୨୫୦ ମିଟର ଦୀର୍ଘ ପ୍ରାଚୀର ଡେଇଁ ଭାରତୀୟ ଅଞ୍ଚଳରେ ପ୍ରବେଶ ଉଦ୍ୟମ କରିବା ସହ ଏହାକୁ ଭାଙ୍ଗି ଦେଇଥିଲେ। ଭାରତ ଏହାର ଦୃଢ଼ ପ୍ରତିବାଦ କରିବା ପରେ ଆଲୋଚନା ମାଧ୍ୟମରେ ସମାଧାନ ହୋଇଥିଲା। ଏମିତି କି ୨୦୧୯ରେ ଲଦାଖ ସଂଘର୍ଷ ପୂର୍ବରୁ ମଧ୍ୟ ଚୀନ୍ ସେନା ଅରୁଣାଚଳ ସୀମାରେ ଭାରତୀୟ ଯବାନଙ୍କ ସହ ସଂଘର୍ଷ କରିଥିଲେ। ଏହା ପରଠାରୁ ଭାରତ ଏଲଏସିରେ ନିଜର ଶକ୍ତି ବୃଦ୍ଧି କରିଚାଲିଛି। ସମ୍ପ୍ରତି ଲଦାଖଠାରୁ ଅରୁଣାଚଳ ପର୍ଯ୍ୟନ୍ତ ସୀମାନ୍ତରେ ୫୦ରୁ ୬୦ହଜାରେ ସେନା ମୁତୟନ ହୋଇଛନ୍ତି।
More Stories
କୌଣସି ପ୍ରସଙ୍ଗରେ ବିଜେପିକୁ ସମର୍ଥନ କରିବା ନାହିଁ ବିଜେଡି
ଜୁନ ୨୫କୁ କଳା ଦିବସ ପାଳନ କରିବ ବିଜେପି
ରାଜ୍ୟର ସବୁ ବ୍ଲକରେ ଶୀତଳ ଭଣ୍ଡାର