June 19, 2024

Satya News

odia news channel

ପେଗାସସ ଗୁଇନ୍ଦାଗିରି ମାମଲା; ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତିଙ୍କ ଅଧ୍ୟକ୍ଷତାରେ ତିନି ସଦସ୍ୟ ବିଶିଷ୍ଟ କମିଟି ଗଠନ କଲେ ସର୍ବୋଚ୍ଚ ନ୍ୟାୟାଳୟ

 

ନୂଆଦିଲ୍ଲୀ: ସରକାରଙ୍କ ଦ୍ୱାରା ପେଗାସସ ସଫ୍ଟୱେର ବ୍ୟବହାର କରାଯାଇ ବିଭିନ୍ନ କ୍ଷେତ୍ରରେ ପ୍ରତିଷ୍ଠିତ ବ୍ୟକ୍ତିବିଶେଷଙ୍କ ସମ୍ପର୍କରେ ଗୁଇନ୍ଦାଗିରି ଅଭିଯୋଗ ମାମଲାରେ ସର୍ବୋଚ୍ଚ ନ୍ୟାୟାଳୟ ତିନି ସଦସ୍ୟ ବିଶିଷ୍ଟ କମିଟି ଗଠନ କରିଛନ୍ତି । ସୁପ୍ରିମକୋର୍ଟର ଜଣେ ଅବସରପ୍ରାପ୍ତ ବିଚାରପତି ଜଷ୍ଟିସ ଆର ଭି ରବିନ୍ଦ୍ରନ୍‍ ଏହି କମିଟିର ନେତୃତ୍ୱ ନେବେ । କମିଟିର ଅନ୍ୟ ସଦସ୍ୟମାନଙ୍କ ମଧ୍ୟରେ ଆଲୋକ ଜୋଷୀ ଏବଂ ସନ୍ଦୀପ ଓବେରଇଙ୍କୁ ନିଆଯାଇଛି । ପେଗାସସ ଗୁଇନ୍ଦାଗିରି ସମ୍ପର୍କରେ ସର୍ବୋଚ୍ଚ ନ୍ୟାୟାଳୟଙ୍କ ନିରୀକ୍ଷଣରେ ତଦନ୍ତ କରାଯିବାକୁ ଆଗତ ଏକାଧିକ ଯାଚିକା ଉପରେ ଶୁଣାଣି କରି ସର୍ବୋଚ୍ଚ ନ୍ୟାୟାଳୟ ଏଭଳି ନିଷ୍ପତ୍ତି ନେଇଛନ୍ତି । ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ,ନ ଭି ରମନାଙ୍କ ନେତୃତ୍ୱରେ ଗଠିତ ସୁପ୍ରିମକୋର୍ଟଙ୍କ ପୀଠ ବୁଧବାର ଦିନ ଏହି କମିଟିକୁ ପେଗାସସ ଗୁଇନ୍ଦାଗିରି ସମ୍ପର୍କରେ ଆସିଥିବା ଅଭିଯୋଗଗୁଡିକର ପୁଙ୍ଖାନୁପୁଙ୍ଖ ତଦନ୍ତ କରି ତାଙ୍କ ରିପୋର୍ଟ ସର୍ବୋଚ୍ଚ ନ୍ୟାୟାଳୟ ନିକଟରେ ରଖିବାକୁ କହିଛନ୍ତି । ମାମଲାର ପରବର୍ତ୍ତୀ ଶୁଣାଣି ଆଠ ସପ୍ତାହ ପରେ ଆରମ୍ଭ ହେବ । ପେଗାସସ ଗୁଇନ୍ଦାଗିରି ବିବାଦରେ କଣ ମିଛ କୁହାଯାଉଛି ଏବଂ ଏହା ପଛରେ ପ୍ରକୃତ ସତ କଣ ତାହା ତଦନ୍ତ କରିବାକୁ କମିଟିକୁ କୁହାଯାଇଛି । ଏଥିସହିତ ଗୋପନୀୟତା ଅଧିକାର ଉଲ୍ଲଂଘନ ବିଷୟର ମଧ୍ୟ ତଦନ୍ତ କରାଯିବା ଆବଶ୍ୟକ । ମାନ୍ୟବର ସର୍ବୋଚ୍ଚ ନ୍ୟାୟାଳୟ ଭାରତୀୟଙ୍କ ଉପରେ ସତର୍କ ଦୃଷ୍ଟି ରଖିବା କ୍ଷେତ୍ରରେ ବିଦେଶୀ ସଂସ୍ଥାର ସଂପୃକ୍ତିକୁ ନେଇ ଗଭୀର ଚିନ୍ତା ପ୍ରକଟ କରିଛନ୍ତି ।
ମାନ୍ୟବର ସର୍ବୋଚ୍ଚ ନ୍ୟାୟାଳୟ କହିଛନ୍ତି ଯେ ପେଗାସସ ଗୁଇନ୍ଦାଗିରି ଅଭିଯୋଗକୁ ନେଇ କେନ୍ଦ୍ର ପକ୍ଷରୁ ନିର୍ଦ୍ଦିଷ୍ଟ ଭାବରେ କିଛି ମନା କରାଯାଇନଥିବାରୁ ଆବେଦନକାରୀଙ୍କ ଯାଚିକାଗୁଡିକୁ ଗ୍ରହଣ କରିବା ବ୍ୟତୀତ ଅନ୍ୟ ବିକଳ୍ପ ନାହିଁ । ସେଥିପାଇଁ ଏହି ବିଶେଷଜ୍ଞ କମିଟି ନିଯୁକ୍ତ କରାଯାଉଛି, ଯିଏ ଏହି ଅଭିଯୋଗର ତଦନ୍ତ କରିବେ ଏବଂ କମିଟିର କାର୍ଯ୍ୟକୁ ସୁପ୍ରିମକୋର୍ଟ ନିରୀକ୍ଷଣ କରିବେ ।

Spread the love