ଆମେରିକା ସେନା ଶିବିରକୁ ଟାର୍ଗେଟ, ମିସାଇଲ ମାଡ଼ କଲା ଇରାନ

ଆମେରିକା ସେନା ଶିବିରକୁ ଟାର୍ଗେଟ, ମିସାଇଲ ମାଡ଼ କଲା ଇରାନ
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଲେ ଅଲ୍ ଇଜ ୱେଲ
ଇରାକ ନଯିବାକୁ ନାଗରିକଙ୍କୁ ଭାରତର ପରାମର୍ଶ

ତେହେରାନ/ୱାଶିଂଟନ, ୮/୧: ସେନା କମାଣ୍ଡର କାସିମ ସୁଲେମାନୀଙ୍କୁ ହରାଇ ମର୍ମାହତ ଇରାନ ବୁଧବାର ଆମେରିକା ଉପରେ ପ୍ରତିଶୋଧ ନେଇଛି । ଇରାକ ରାଜଧାନୀ ବାଗଦାଦରେ ଥିବା ଆମେରିକାର ଦୁଇଟି ସେନା ଶିବିରକୁ ଟାର୍ଗେଟ କରିଛି । ଦୁଇଟି ଏୟାରବେସ ଉପରେ ଘନଘନ ବାଲିଷ୍ଟିକ କ୍ଷେପଣାସ୍ତ୍ର ମାଡ଼ କରିଛି ଏହି ପଶ୍ଚିମ ଏସୀୟ ରାଷ୍ଟ୍ର । ଏଥିରେ ଆମେରିକାର ୮୦ରୁ ଅଧିକ ସୈନ୍ୟ (ତେହେରାନ ଭାଷାରେ ସେମାନେ ଆତଙ୍କବାଦୀ) ନିହତ ହୋଇଥିବା ଇରାନର ସରକାରୀ ଟିଭି ଚ୍ୟାନେଲରେ ଦାବି କରାଯାଇଛି । ଆମେରିକା ପ୍ରତିଶୋଧପରାୟଣ ହୋଇ ଆକ୍ରମଣ କଲେ ଆହୁରି ୧୦୦ ସ୍ଥାନରେ କ୍ଷେପଣାସ୍ତ୍ର ମାଡ଼ କରିବୁ ବୋଲି କୁହାଯାଇଛି । ତେବେ ମୃତାହତଙ୍କ ସଂଖ୍ୟାକୁ ନେଇ ଆମେରିକା କିଛି ସ୍ପଷ୍ଟ କରିନାହିଁ । ପେଣ୍ଟାଗନ ପ୍ରବକ୍ତା ଜୋନାଥନ ହୋଫମ୍ୟାନ ଇରାନର ମିସାଇଲ ଆକ୍ରମଣକୁ ନେଇ କହିଛନ୍ତି ଯେ ବୁଧବାର ସକାଳେ ଆମେରିକୀୟ ସୈନ୍ୟ ଓ ଏହାର ସହଯୋଗୀ ବଳ ରହୁଥିବା ଶିବିର ଉପରେ ଇରାନ ଏକ ଡଜନରୁ ଅଧିକ ମିସାଇଲ ମାଡ଼ କରିଛି । ଆମେ ଯୁଦ୍ଧରେ ହୋଇଥିବା କ୍ଷତିର ପ୍ରଥମିକ ଆକଳନ କରୁଛୁ । ଏନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଅବଗତ କରାଯାଇଛି । ଟ୍ରମ୍ପ ନିଜ ପ୍ରତିକ୍ରିୟାରେ ‘ଅଲ ଇଜ ୱେଲ’ ବୋଲି ଟୁଇଟ କରିଛନ୍ତି ।
ଅନ୍ୟପକ୍ଷେ ଆମେରିକା-ଇରାନ ମୁହାଁମୁହିଁ ହୋଇଥିବାବେଳେ କୌଣସି ଭାରତୀୟ ଇରାକ ଯାତ୍ରା କରନ୍ତୁ ନାହିଁ ବୋଲି ନୂଆଦିଲ୍ଲୀ ଆଡଭାଇଜରି ଜାରି କରିଛି । ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ ଅନୁସାରେ ଇରାକରେ ବର୍ତ୍ତମାନର ସ୍ଥିତିକୁ ଦୃଷ୍ଟିରେ ରଖି ଭାରତୀୟ ନାଗରିକଙ୍କୁ ପରାମର୍ଶ ଦିଆଯାଇଛି ଯେ ସେମାନେ ପରବର୍ତ୍ତୀ ଅଧିସୂଚନା ପର୍ଯ୍ୟନ୍ତ ଜରୁରୀ ନ ଥିଲେ ଇରାକ ଗସ୍ତ କରନ୍ତୁ ନାହିଁ । ଇରାକରେ ରହୁଥିବା ଭାରତୀୟଙ୍କୁ ମଧ୍ୟ ସେଠାରେ ଯାତ୍ରା ନ କରିବାକୁ କୁହାଯାଇଛି ।